काठमाडौँ, रोजगारीका लागि विभिन्न देश पठाइदिने प्रलोभनमा पार्दै वैदेशिक रोजगारीका नाममा ठगी गर्ने भोजपुर घर भएका झापाको पथरियामा बस्ने पर्शुराम गुरुङ थाइल्याण्डमा पक्राउ परेका छन् ।
ठगी गरेको आरोप लागेका उनलाई थाइल्याण्डस्थित नेपाली राजदूतावास र नेपाल प्रहरीको सहयोगमा त्यहाँको प्रहरीले बुधबार पक्राउ गरेको हो । उनले क्यानडा, अष्ट्रेलिया, अमेरिका, कोरिया, मकाउलगायत देशमा पठाइदिने प्रलोभन देखाउँदै विभिन्न व्यक्तिबाट करोडौँ रुपैयाँ ठगी गरेका छन् ।
ठगी गरेको आरोपमा राजदूतावासमा उजुरी परेको थियो । उजुरी पश्चात उनि फरार थिए । उनीमाथि नेपाल प्रहरीले इन्टरपोलमार्फत पक्राउ पूर्जीसमेत जारी गरेको थियो । दूतावासद्वारा जारी विज्ञप्तिमा उल्लेख भए अनुसार उनलाई थाइल्याण्ड प्रहरीले नेपाली राजदूतावासका प्रतिनिधिको उपस्थितिमा बैंककमा पत्रकार सम्मेलन गरी सार्वजनिक गरेको हो ।
उनि थाइल्याण्डमा पनि अवैध राहदानी र विनाप्रवेशाज्ञा गैरकानूनीरुपमा बसेको अपराधमा त्यहाँको सरकारले गुरुङमाथि अनुसन्धान र कारवाही भैरहेको जनाएको छ ।
