काठमाडौँ, धादिङको गल्छी गाउँपालिकामा ट्रक, माइक्रो र मोटरसाइकल एक आपसमा ठोक्किँदा दुई जनाको ज्यान गएको छ । उक्त दुर्घटनामा परि चन्द्रागिरीका २ जनाको मृत्यु भएको हो ।
मृत्यु हुनेमा चन्द्रागिरी नगरपालिका ५ काठमाडौंका २९ वर्षीय राज महर्जन र ३० वर्षीय कविकुमार महर्जन रहेका छन् । जिल्ला प्रहरी कार्यालय धादिङका प्रवक्ता तथा प्रहरी नायव उपरीक्षक प्रकाश विष्टका अनुसार उनीहरुको घटनास्थल मै मृत्यु भएको हो ।
बुधबार चितवनबाट काठमाडौंतर्फ आउँदै गरेको बा ९७ प २५३८ नम्बरको मोटरसाइकल काठमाडौंबाट नवलपरासीतर्फ जाँदै गरेको बा ४ ख ९१०३ नम्बरको माइक्रो बससँग ठोक्किँदा उक्त दुर्घटना भएको हो ।
संगै अनियन्त्रित भएको मोटरसाइकललाई चितवनबाट काठमाडौंतर्फ आउँदै गरेको ना ६ ख ५६१४ नम्बरको ट्रकले किचेको प्रहरीले जनाएको छ ।
प्रहरीका अनुसार हाल दुबै शव पोष्टमार्टमको लागि प्राथमिक स्वास्थ्य केन्द्र गजुरीमा राखिएको छ । जिल्ला प्रहरी कार्यालय धादिङका अनुसार माइक्रोबस र ट्रक चालक दुबैलाई प्रहरीले पक्राउ गरेको छ ।
