काठमाडौँ, बालुवाटार जग्गा प्रकरणमा मुछिएका सत्तारूढ नेपाल कम्युनिष्ट पार्टीका महासचिव विष्णु पौडेलले उक्त जग्गा व्यक्तिको नाममा ल्याउन आफ्नौ कुनै संलग्नता भेटिए आफु जस्तोसुकै कारवाही भोग्न तयार रहेको बताएका छन् ।
उनले उक्त प्रकरणमा आफुुसहित शेरबहादुर देउवा, माधव नेपाल र बाबुराम भट्टराई समेतको नाम जोडेर आएका समाचारप्रति गम्भीरतापूर्वक छानबिन गर्न माग समेत गरेका छन् ।
सोमबार प्रतिनिधि सभामा भएको सरकारको नीति तथा कार्यक्रममाथिको छलफलमा बोल्दै उनले भने, ‘ केही समययता मेरो र पूर्वप्रधानमन्त्रीहरू शेरबहादुर देउवा, माधवकुमार नेपाल, बाबुराम भट्टराईको नाम जोडिएका समाचार प्रकाशित भएका छन्। यस विषयमा मैले प्रेस वक्तत्वयमार्फत् सत्यतथ्य सार्वजनिक गरिसकेको छु । गैरकानुनी तरिकाले व्यक्तिका नाममा दर्ता भएका सरकारी र सार्वजनिक जग्गा फिर्ता ल्याउने निर्णयको हार्दिकतापूर्वक स्वागत गर्दछु । ‘
साथै यस बारे सत्य तथ्य सार्वजनिक गर्न माग गर्दै उनि भन्छन्, ‘ दोषीलाई कडा कानुनी कारबाही होस् भनी माग गर्दछु । र म आफू दोषी ठहर भएमा जुनसुकै सजाय भोग्न पनि तयार रहेको स्पष्ट गर्दछु । ‘