पब्लिक आवाज /आलोक यादव
सिरहा ,२०७५ मंसिर २६ गते । महोत्तरीमा खेतमा काउली हेर्न गएका एक पुरुषको शव नजिककै उखुबारीमा भेटिएको छ । महोत्तरीको औरही नगरपालिका वडा नं. २ फूलबरिया बस्ने स्थानीय शिवशरण महतोका ४० वर्षीय छोरा बेचु महतो नजिकको शव उखुबारीमा फेला परेको छ । गएराती करिब १ बजे उनी खेतमा लगाएको काउली हेर्न बाहिर निस्केका थिए ।
राती काउली हेर्न निस्केका महतो धेरै बेरसम्म नआएपछि उनका छोराहरुले खोजी गर्दै खेत तर्फ गएका थिए । बुवालाई नभेटे पछि स्थानीयहरुलाई खबर गरेका थिए । स्थानीयले प्रहरीलाई खबर गरे लगत्तै गएका प्रहरी टोलीले उनको शव स्थानीय रामराज ठाकुरको उँखुबारीमा फेला पारेको हो ।
गाँउभन्दा करिब ५०० मिटरको दुरीमा पूर्व तर्फ महतोको काउलीबारी रहेको छ । जंगलबाट आउने गरेको नीलगाईले तरकारी खेती सखाप पार्ने गरेको भन्दै निलगाई धपाउन राती खेत गएका महतो मृत भेटिएका हुन् ।
जिल्ला प्रहरी कार्यालय महोत्तरीका अनुसार महतोको शरिरमा निलडाम देखिएको छ । उनको घाँटी थिचेर हत्या गरेको हुन सक्ने अनुमान गरिएको छ । यस घटनाबारे थप अनुसन्धान पश्चात जानकारी आउने अनुसन्धान शाखाका प्रहरी निरीक्षक विज्ञान बस्नेतले बताए । महतोको शव पोष्टमार्टमको लागि जनकपुर अञ्चल अस्पताल ल्याउने तयारी भईरहेको छ ।
