बोक्सीको आरोपमा यातना दिनेलाई कारवाही गर्न माग

फाइल फोटो

काठमाडौं, ५ असोज ।  अखिन नेपाल महिला सङ्घले मूर्तिदेवी यादवलाई बोक्सीको आरोपमा यातना दिनेलाई कारवाहीको माग गरेको छ । सङ्घकी संयोजक अमृता थापा र सहसंयोजक सीता पौडेलले आज विज्ञप्ति जारी गर्दै सिराहाको नवराजपुर गाउँपालिका–५ कसुन्डी निवासी ४५ वर्षिया यादवलाई कथित बोक्सीको आरोपमा मलमुत्र खुवाइ क्रुर यातना दिएर गम्भीर घाइते बनाएको प्रति ध्यानाकषण भएको जनाउँदै कारवाही गर्न माग गर्नुभएको छ ।

उहाँहरुले विज्ञप्तिमा कथित वोक्सीको नाममा यस्तो अपराधिक कार्य गर्नु महिला हिंसा र मानवअधिकार उल्लंघनको भएको जनाउँदै समाजका भद्र तथा अगुवा भनिएकाबाट भएको यस्तो बर्बर यातनाप्रति घोर निन्दा र भत्र्सना गर्नुभएको छ । गत भदौ २९ गते गाउँको एउटा बच्चा बिरामी भएको, अर्को एक जनाको चट्याङ लागेर निधन भएको र पोखरीमा डुबेर एक छिमेकीको निधन भएको घटनामा यादवलाई कथित बोक्सीको ओरोपमा यातना दिइएको थियो । विज्ञप्तिमा मूर्तिदेवीमाथि हिंसा गर्ने स्थानीय धर्मनाथ यादव, उनका छोरा सन्तोष र सोही ठाउँका देवनाथ यादव, कृष्ण यादव, ब्रह्म यादवलगायत घटनामा संलग्न व्यक्ति अझै पनि निर्वाध र स्वतन्त्ररुपमा घुमिरहेका हुँदा उनीहरुलाई गिरफ्तार गरि कानूनी दायरामा ल्याई कडा भन्दा कडा कारवाहीको माग गरिएको छ ।

यादवको स्वास्थ्य उपचार, मनोसामाजिक परामर्श र क्षतिपूर्तिसहित पारिवारिक र सामाजिक पुर्नस्थापनाका लागिसमेत माग गरिएको छ । “संविधानमा समानताको हक, महिलाको हक, लैङ्गिक विभेद विरुद्ध कानूनी व्यवस्थाका साथै राष्ट्रिय महिला आयोग, राष्ट्रिय मानवअधिकार आयोगलगायतका संरचनागत व्यवस्था हुँदाहुँदै पनि त्यसको प्रभावकारी कार्यान्वयनमा अझै समस्या रहँदै आएको छ”, विज्ञप्तिमा भनिएको छ, “जसका कारण महिलामाथि बेला–बेलामा यस किसिमका अन्धविश्वास र आग्रह पूर्वाग्रहका रुपमा हुने गरेका चरम हिंसा र ज्यादती सामाजिक कलंकका रुपमा रहँदै आएका छन् ।”

फेसबुकबाट तपाईको प्रतिक्रिया