काठमाडौँ, मंगलबार बिहान कैलालीमा पूर्वबाट पश्चिमतर्फ जाँदै गरेको ट्रकले ठक्कर दिँदा एक महिलाको ज्यान गएको छ । उक्त दुर्घटनामा स्थानीय लम्की बहुमुखी क्याम्पसमा अध्ययनरत छात्रा सुनीता रावलको मृत्यु भएको छ ।
उक्त ना ७ ख ९२३३ को ट्रक र ट्रक चालक सुनील भण्डारीलाई प्रहरीले नियन्त्रणमा लिएको छ । प्रहरीले नियन्त्रणमा लिएर कारबाही गर्ने बताए पनि स्थानीय भने प्रदर्शनमा उत्रिएका छन् ।
प्रदर्शनकारीहरुले दोषीमाथि कारबाही गर्नुका साथै मृतकको परिवारलाई क्षतिपूर्ति दिनुपर्ने माग राखेका छन् । आक्रोसित स्थानीयको प्रदर्शनले हाल लम्कीको आवस्था निकै तनावग्रस्त बनेको छ र अवस्था नियन्त्रणमा लिन प्रहरी परिचालन गरिएको छ ।
प्रदर्शनकारीलाई तितरवितर पार्न केही सेल अश्रुग्यास प्रहार गरिएको कैलालीका प्रहरी प्रमुख प्रहरी उपरीक्षक आभूषण तिम्सिनाले बताएका छन् । व्यापक मात्रामा प्रहरी परिचालन गरिएकाले अवस्था नियन्त्रणमा आउने उनको भनाइ छ ।
